တရားမျှတမှုကို တိုင်တည်ခြင်း(သို့)“မူဝါဒမျက်လုံး"
ကိုကိုဦး(တပ်ရင်း-၁၀၂)
ဇန်နာဝါရီလ(၆)ရက်၊၂၀၁၃
မြောက်ပိုင်းလူသတ်မှုကိုဘယ်လိုဖြေရှင်းကြမလဲ
ပြဿနာကိုချည်းကပ်ပုံကရိုးရှင်းဖို့လိုတယ်၊ မူဝါဒအပေါ်အခြေခံဖို့လိုပါတယ်၊
ပြဿနာရဲ့ကျောရိုးက လူသတ်မှု murder crime ဖြစ်တယ်၊ ကျောင်းသား
တပ်မတော်ရဲ့မူဝါဒ policy ကြောင့်ဖြစ်လာရတာမဟုတ်ဘူး၊ ကျောင်းသား
တပ်မတော်မှာ စည်းကမ်းအပြည့်နဲ့ရေးဆွဲထားတဲ့အခြေခံဥပဒေရှိတယ်၊
Rules and regulation တွေအတိအကျရှိတယ်၊
ဒါတွေကိုဘယ်သူတွေကဖေါက်ချက်ခဲ့သလည်း၊ ဘယ်နေရာမှာဖေါက်ဖျက်ခဲ့သလည်း၊
ဘယ်လိုအခြေအနေမျိုးမှာဖေါက်ဖျက်ခဲ့သလည်း၊ ဘယ်လိုသောအကျပ်အတည်း
အောက်မှာဖြစ်ခဲ့ရသလည်း၊ ဘယ်လိုလူမျိုးတွေကဒီလိုပြစ်မှုတွေကိုကျူးလွန်ခဲ့သလည်း၊
ဥပဒေနဲ့အညီဖြစ်ခဲ့သလား၊ တရားမျှတမှုရှိခဲ့သလားမရှိခဲ့ဘူးလား စသည်တို့ကို
ကျနော်တို့တော်တော်များများသိခဲ့ကြားခဲ့ကြပြီဖြစ်ပါတယ်၊
အားလုံးကိုခြုံပြီးပြောရမယ်ဆိုရင် အပြစ်မဲ့ကျောင်းသားတပ်မတော်ရဲဘော်တွေ
မြောက်ပိုင်းမှာလူအသတ်ခံခဲ့ရတယ်။ နိုင်ငံရေးအသတ်ခံခဲ့ရတယ်၊
ဘ၀နဲ့ရင်းပြီးနစ်နာခဲ့ကြရတယ်၊ ဒါကိုစာနာ နားလည်ပေးရမယ်၊
ဒါဟာကျနော်လိုချင်တဲ့ ကျနော်တို့တိုက်ပွဲဝင်နေတဲ့ လူအခွင့်အရေးဖြစ်တယ်၊
ကျနော်လိုချင်တဲ့ တရားမျှတမှုဖြစ်တယ်၊ ဘက်မလိုက်မှုဖြစ်တယ်၊
ဒါတွေကိုမျက်ကွယ်ပြုပြီး မကဒတကိုကျနော်တို့ချစ်ပါတယ်၊ လူ့အခွင့်အရေးကို
ကျနော်မြတ်နိူးပါတယ်လို့ လူထုကိုချပြလို့မရပါ၊ အမှန်တရားကို လက်ဆုတ်ကိုင်
နိုင်ဖို့ ကျနော်တို့လက်တွေအားလုံး မူဝါဒမြဲအောင်ဆုတ်ကိုင်ထားဖို့လိုပါတယ်၊
အခြားတစ်ဖက်မှာလည်း ကျောင်းသားတပ်မတော်ဟာ ဒါးစားခံဖြစ်ခဲ့ရပြန်တယ်၊
အတိအကျပြောရရင် ကျောင်းသားတပ်မတော်မှာတိကျစွာပြဒါန်းထားတဲ့
ဥပဒေကိုဖေါက်ဖျက်ကျော်လွန်ပြီး ဥပဒေမဲ့လုပ်ခဲ့တဲ့လူတွေကြောင့်
ဆင်ချင်တုံတရားကင်းမဲ့သူတွေကြောင့် ကျောင်းသားတပ်မတော်ဟာ
ဒါးစားခံဖြစ်ခဲ့ရတယ်၊ ဒီနေ့နာမယ်ပျက်ခဲ့ရတယ်၊ အဓိကတာဝန်ရှိသူတွေပါခဲ့တယ်၊
ဒီလိုလုပ်ရပ်ဖြစ်လာဖို့အတွက်ဖြစ်စဉ်တစ်လျှောက်လုံးမှာပါခဲ့သူတွေအားလုံးကို
မိတ်ဖက်ကင်းကင်း ရှင်းရှင်းမြင်ဖို့လိုတယ်၊ ယုတ်အဆွဆုံးအိမ်သူသက်ထားပါ
နေခဲ့ရင်တောင် ညှာတာပေးလို့မရတာ တရားမျှတမှုပါ၊ ခင်ဗျားတို့ကျနော်တို့အားလုံး
လိုချင်တောင်းတနေကြတဲ့ တရားမျှတမှုတွေပါ၊
ဒီတော့ ဒီလိုဘ၀နဲ့ရင်းပြီးနစ်နာခဲ့ကြသူတွေအတွက် ဘာတွေလုပ်သင့်သလည်း၊
ပြီးတော့ ဒါးစားခံဖြစ်ခဲ့ရတဲ့ကျောင်းသားတပ်မတော်ကို ဘယ်လိုလုပ်ပြီး
ဒါးစားခံဘ၀ကနေလွတ်အောင်လုပ်ကြမှာလဲ၊ အမှန်တကယ်တော်လှန်ရေးအကျိုးစီးပွါးကို
ထမ်းဆောင်ရင်း အသက်ပေးသွားသူတွေကျိုးကန်းသွားသူတွေ အကောင်းပကတိ
ဘ၀တစိတ်တပိုင်းကိုတော်လှန်ရေးမှာ မြှုပ်နှံခဲ့သူတွေအားလုံးရဲ့ ဂုဏ်သိက္ခာကို
ဘယ်လိုပြန်ဖေါ်ကြမှာလဲဆိုတာ အရေးကြီးတဲ့သမိုင်းတစ်ခုပါ၊
ကျနော်မြင်တာကတော့ ဒီဖြစ်စဉ်ကြီးတစ်ခုလုံးမှာ စိုးရိမ်ကြပူပန်ကြသူတွေအား
လုံးဟာ လက်ရှိကျောင်းသားတပ်မတော်တစ်ခုနဲ့သာ သက်ဆိုင်ခြင်းမရှိပဲ
အဖွဲ့အတွင်းအတွင်းအပြင်ရှိ စွန့်လွတ်ပေးဆပ်ခဲ့သူတွေအားလုံးနဲ့လည်း
သက်ဆိုင်နေပြန်ပါတယ်၊ ဒါကြောင့်လက်ရှိပြဿနာဖြေရှင်းမှုကိုမပြတ်
လေ့လာနေကြတာပဲဖြစ်တယ်၊ ကိုယ်တိုင်လည်းပါဝင်ဖြေရှင်းပိုင်ခွင့်နိုင်ခွင့်
မရှိတော့လည်း အကောင်းဆုံးဖြစ်လာပါစေလို့ပဲဆုတောင်းပေးနေရတယ်၊
တစ်ခါတစ်လေ ဖြေရှင်းပုံဖြေရှင်းနည်းတွေကလည်းလို့ရာမရောက်ပဲ
အလှမ်းဝေးသွားတဲ့အခါမျိုးမှာစိတ်ဓါတ်ကျမိတာတော့အမှန်ပါ၊
အကောင်းဆုံးဖြစ်စေချင်သောစိတ်ကျနော်အားလုံးမှာရှိမယ်လို့ယုံကြည်တယ်၊
ကိုယ်အထင်နဲ့ကိုယ်အမြင်ဖြေရှင်းနေကြတာထက် မူဝါဒအပေါ်၊
လူ့အခွင့်အရေးအပေါ်၊ တရားမျှတမှုအပေါ် စံထားပြီးဖြေရှင်းနိုင်သူတွေ
ရှိလာမှပဲ ကောင်းမွန်လှပတဲ့သမိုင်းတစ်ခုကိုပြန်ရေးနိုင်မယ်လို့ထင်ပါတယ်၊
ကျနော်တို့မှာဘက်လိုက်မှုကင်းတဲ့အမြင်မျိုးရှိဖို့လိုတယ်၊ “မူဝါဒမျက်လုံး"လို့ဆိုရမဲ့
အမြင်မှန်ရှိဖို့လည်းအထူးလိုအပ်လှပါတယ်၊ ဘာကြောင့်ပြောရသလည်းဆိုတော့
ကျနော်တို့တော်တော်များများဟာ ပုဂ္ဂိုလ်ကိုခင်ပြီး တရားမင်တတ်သူတွေအများကြီး
ရှိနေသေးလို့ဖြစ်ပါတယ်၊
အမှန်တကယ်မူဝါဒမျက်လုံးနဲ့ ကြည်ကြစတမ်းဆိုလျှင် အသတ်ခံခဲ့ရသူတွေဟာ
ကျနော်တို့တော်လှန်ရေးလုပ်ဖော်ကိုင်ဘက် ညီအစ်ကိုတွေပါ၊ ကျနော်တို့
မကဒတ အဖွဲ့ဝင်တွေပါ၊ သူတို့ခံစားမှုကိုတကယ်နားလည်ရင်
ကျနော်တို့အမှန်တရားဖြစ်စဉ်မှာ အားတက်သရောပူးပေါင်းဆောင်ရွက်ရမှာ
ဖြစ်သလို သူတို့ကိုလည်းကျနော်တို့ချစ်ကြတဲ့ ကျောင်းသားတပ်မတော်ရဲ့
ဂုဏ်သိက္ခာ အမှန်ပြန်လည်ရရှိရေးမှာ တတပ်တအားပါဝင်ပေးကြဖို့ကိုလည်း
လမ်းဖွင့်ပေးရမှာဖြစ်ပါတယ်၊
လက်ရှိအနေအထားမှာ ထောက်လှမ်းရေးဖြစ်ခြင်းမဖြစ်ခြင်းကို အကြောင်းပြပြီး
လူသတ်သမားတွေကို ထောက်ခံသူတွေရှိနေသေးတာကလည်းတစ်မှောက်ဖြစ်
နေတယ်၊ ထောက်လှမ်းရေးဆိုတာ မင်းလည်းဖြစ်နိုင်ငါလည်းဖြစ်နိုင်တဲ့တောတွင်း
ဥပဒေရဲ့အားနည်းချက်ဖြစ်လို့ အာဏာလက်ရှိ ရှိနေသူကအသာစီးရတတ်တဲ့
သဘာဝပါ၊
တကယ်ဆိုရင်ထောက်လှမ်းရေးက လူသတ်သမားလည်းဖြစ်နိုင်ပါတယ်၊
ဒါဆိုရင်တော့ ထောက်လှမ်းရေးဖြစ်ခြင်းမဖြစ်ခြင်း အဓိကအကြောင်းမဟုတ်
ကျောင်းသားတပ်မတော်ရဲ့ဥပဒေကိုအလွဲသုံးစားလုပ်တဲ့ တာဝန်မဲ့ခဲ့သူတွေကြောင့်
ဒီဆိုးကျိုးတွေကိုငါတို့ညီအစ်ကိုတွေအားလုံးခံနေရပါတယ်ဆိုတဲ့အမြင်မျိုးနဲ့သာ
ပြဿနာကိုချည်းကပ်သင့်ပါတယ်၊
အခုကြည့်ကြပါ၊ ခံရသူအချင်းချင်းကဆန့်ကျင်ဘက်တွေဖြစ်ပြီး အချင်းချင်းပြန်ချနေ
ရသလိုဖြစ်နေတယ်၊ ဒါးစာခံဖြစ်ခဲ့ရတဲ့ ကျောင်းသားတပ်မတော်ရယ် အသတ်ခံခဲ့ရ
အနှိပ်စက်ခံခဲ့ရတဲ့ ကျောင်းသားတပ်မတော်တပ်ဖွဲ့ဝင်ဟောင်းတွေ
ထိပ်တိုက်တွေ့နေကြတယ်၊ အမှန်တကယ်ဆိုရင် ပုခုန်းဖက်ပြီးဖြေရှင်းရမဲ့ကိစ္စတွေပါ၊
မင်းလဲခံခဲ့ရတယ်၊ ငါတို့လည်းခံခဲ့ရတယ်ဆိုပြီး ညီရင်းအစ်ကိုစိတ်ဓါတ်နဲ့ဖြေရှင်းကြရမှာပါ၊
ဒီလိုစိတ်ဓါတ်ရှိတဲ့သူတွေမရှိတော့ဘူးလား၊ မရနိုင်တော့ဘူးလို့မေးရင်
ရှိတယ်လို့ပဲဖြေရမယ်၊ လူမှန်နေရာမှန်မရှိသေးတဲ့ပြဿနာကလည်း
ဒီနေ့အနေအထားအရဖြေရှင်းရတာအလွန်ခက်ခဲနေတာကပဲသက်သေပြနေပါတယ်၊
ကျနော်အနေနဲ့လက်ရှိနှစ်ပါတီဘက်နှစ်ဘက်ဖြေရှင်းမှုကလုံလောက်တဲ့အဖြေကို
မရနိုင်မှန်း ခန့်မှန်းမိပါတယ်၊ ဖြစ်နိုင်ရင်တော့ မကဒတအနေနဲ့
အရေးပေါ်ညီလာခံမျိုး(သို့) အထူးစီမီနာလိုတစ်ခုကို ကျယ်ကျယ်ပြန့်ပြန့်ခေါ်ယူပြီး
ဘက်စုံတက်စုံဖြေရှင်းသွားပါကပိုမိုကောင်းမွန်တဲ့
ရလဒ်ကိုရနိုင်မယ်လို့မျှော်လင့်ပါတယ်၊
ကျနော်၏အမြင်ကိုရိုးရိုးသားသားဝေမျှတာပါ။ အားလုံးကိုလေးစားပါတယ်၊
No comments:
Post a Comment